Четири приказни од Шведска кои даваат надеж во борбата против заразата

2

Во ова време на голема криза предизвикана од пандемијата на коронавирус лесно е да се чувствувате беспомошно, но во вакви ситуации помага да се види напредокот што е постигнат. Local.se, шведска веб-страница насочена кон странците во таа земја, дава четири примери на шведска практична помош во борбата против вирусот.

Фабриката за производство на вотка АБСОЛУТ ќе работи на средства за дезинфекција

Здравствениот сектор во Шведска предупреди на потенцијален недостиг на основни материјали како што е средството за дезинфекција на рацете. Абсолут адаптирал дел од своето производство и произведува чист алкохол наместо вотка, кој може да се користи за дезинфекција и чистење.

Веќе се произведени 200.000 литри средство за дезинфекција, објавија од фабриката. Производот ќе се меша со гел од други произведувачи за да се добијат производи како што се гел за раце. Компанијата одлучи да им дозволи на шведските власти да го користат бесплатно производот наместо да го продаваат на пазарот, со намера да го користат таму каде што е најпотребно – во здравствениот сектор.

Сканија и САС испраќаат персонал во здравствениот сектор

Производителот на возила Сканија и скандинавската авиокомпанија САС привремено испратија илјадници вработени дома заради кризата со коронавирус. Некои од нив сега ќе работат на работни места што се клучни во борбата против вирусот. Работниците во одделите за производство и логистика на Сканија им помагаат на медицинската компанија „Гетингџ“ да го зголеми производство на респиратори. И стотици вработени во САС, кои имаат медицинско образование, ќе поминат низ краток курс за медицинска нега и потоа ќе помогнат во шведските болници.

Заштитни маски во 3Д-печатење

Заштитните маски се дел од опремата што е во голема побарувачка во здравствениот сектор. Истражувачите од универзитетот за технологија Лулеа ги користат своите 3Д принтери за производство на маски за вработените во здравствениот сектор. Маските ќе бидат дистрибуирани бесплатно во општините и локалните болници.

Тестирање на лек развиен за борба против ебола

Научниците ширум светот истражуваат лекови и вакцини кои би можеле да помогнат во лекувањето на коронавирусот, а истото важи и за Шведска. Некои луѓе кои биле сериозно болни од коронавирус во Шведска, добиле терапија со експериментален лек кој првично бил развиен за борба против ебола.

Шведската агенција за лекови додели специјално овластување за употреба на експерименталниот лек Ремдесивир, кој е дизајниран за борба против ебола, но не е доволно ефикасен. Сепак, научниците вклучени во тестовите велат дека овој лек има добри ефекти во тестирање против коронавирус и сродни вируси.