Најлошо погодената германска област стана коронавирус „лабораторија“

1

Германските научници го објавија она што го опишаа како прва студија, за тоа како се шири коронавирусот и како може да се спречи, користејќи го најтешко погодениот округ во Германија како лабораторија во реалниот живот.

Вирусот се шири многу брзо во областа Хајнсберг во која живеат 250 илјади жители. Во оваа област, во Северно Рајна-Вестфалија, која граничи со Холандија, регистрирани се 1.281 потврдени инфекции и 34 смртни случаи. Досега повеќе од 550 луѓе се опоравиле од болеста. Напредокот на вирусот во Хајнсберг, наречен „германски Вухан“, по кинескиот град каде се појави глобалната пандемија, е две до две и пол недели пред остатокот од земјата.

Во текот на следните недели, водечки виролози и тим од 40 студенти по медицина ќе ја користат оваа област како своевидна лабораторија за проучување на вирусот. „Студијата за кластери на случајот Ковид-19“ започна во вторникот наутро, ќе се следат 1.000 луѓе кои се избрани за да бидат претставници на германското население како целина.

Резултатите ќе се искористат за создавање на план за тоа како Германија може да се справи со вирусот во текот на следните неколку години, рече професор Хендрик Стрек, главен виролог на Универзитетот во Бон.

„Ова е голема шанса за цела Германија“, рече Стрек на состанокот на парламентарците, што се емитуваше во живо на телевизија.

„Ќе собереме информации и практични совети за тоа како да се справиме со„ КОВИД-19 “ и како можеме да постигнеме понатамошно задржување на истиот, без нашите животи да мора да бидат во мирување во текот на еден период од годината“, продолжи Стрек.

Резултатите од студијата потенцијално ќе влијаат и на другите земји. Научниците ќе одат во 500 домаќинства, како и градинки и болници за да учат како се шири инфекцијата. Тие ќе го разгледаат секој аспект на денешниот живот, од степенот до кој децата го пренесуваат на возрасните, како се шири во семејството – од мобилни телефони до рачки на вратите, до чаши и далечински управувачи од ТВ – до тоа дали миленичињата можат да го шират и дали се пренесува преку одредени видови храна.

„Ако има начини да се спречи ширење на болеста во нашето опкружување, ние сакаме да знаеме какви се тие, со цел да откриеме како можеме слободно да се движиме во околината заедно“, рече Стрек.

„Врз основа на нашите откритија, ќе можеме да дадеме препораки, кои политичарите можат да ги користат за да ги донесат точните и прави одлуки. Можеби мерките што се применуваат во моментов се добри, и ние велиме: „Не ги намалувајте.“ Но, очекувам дека ќе можеме да дојдеме до низа предлози за тоа како може истите да се намалат“, рече Стрек.

Со тестирање на имунитет од „КОВИД-19“ од страна на учесниците во студијата, научниците исто така ќе можат да утврдат каков е процентот на неоткриени случаи на национално ниво. Првите резултати се очекува да бидат објавени следната недела, иако целото собирање докази ќе трае неколку недели и неговата анализа веројатно ќе се спроведува со месеци и години.

Стрек рече дека не бил свесен за какви било други студии што се вршат во други жаришта, како Вухан во Кина, Бергамо во Италија или Алзас во Франција. Тој беше изненаден што советниците на владата за прашања од областа на јавното здравство веќе не ја оствариле идејата.

„На крајот на краиштата, здравјето е од национален интерес“, потенцира Стрек.

Тој исто така рече дека се надева оти студијата ќе им помогне на тие луѓе кои се на позиции за носење одлуки кога имаат „етичка дилема“ помеѓу продолжување на нормалниот живот и намалување на смртноста.

Извор theguardian