Последното, осмо коло од лигашкиот дел ги расчисти сите дилеми околу изгледот на табелата и ги потврди четирите екипи кои ќе се борат за едно место во Супер лигата наредната сезона. Во фокусот на велешката јавноста е Борец Баскет, кој и покрај поразот во Прилеп, успеа да обезбеди пласман меѓу најдобрите четири.
Екипите на Струмица 2001 и Соколи 1933 ја оправдаа фаворитската улога и со нови победи ја заокружија сезоната со идентичен скор (11-3). Сепак, струмичани ја имаат предноста поради подобриот меѓусебен биланс, што им ја донесе лидерската позиција пред плеј-оф пресметките.
За Борец Баскет, разврската дојде по поразот на гостувањето во Прилеп и победата на Бутел против Вардар, со што велешани ја завршија трката на четвртата позиција. Но, и покрај тоа, тимот од Велес ја оствари главната цел, место во полуфиналето и шанса за пласман во Супер лигата.
Полуфиналните двојки носат вистинска драма, Струмица 2001 ќе се соочи со Борец Баскет, додека Соколи 1933 ќе ги одмери силите со Бутел. За велешани ова значи дуел со првопласираната екипа, која во првиот дел од првенството беше поразена во Велес со 79:73, додека во Струмица, домашниот состав беше подобар со резултат 88:53.
