Во спортската сала при ООУ „Блаже Конески“ во Велес, во недела на 10 мај ќе се одиграат натпреварите од третото турнирско коло во рамките на Државната лига на ветерани во одбојка. На програмата се три интересни натпревари, а учество ќе земат екипите на Шкендија, Струмица, Борец Велес, Гевгелија, Скопје и Тетово, додека слободна во ова коло е екипата на 11 Октомври Прилеп.
Според распоредот, турнирот ќе започне во 10 часот со дуелот меѓу Шкендија и Струмица. Во вториот натпревар, со почеток од 11:30 часот, домашниот состав Борец Велес ќе се соочи со Гевгелија, додека во последниот меч од денот, од 13 часот, ќе играат Скопје и Тетово.
По одиграното второ коло, на табелата води Шкендија со максимални шест бодови и сет разлика 4:0. Второпласирана е екипата на 11 Октомври Прилеп со пет бодови, додека Борец Велес е на третата позиција со три освоени бода и натпревар помалку.
Организаторите очекуваат интересни и неизвесни натпревари, како и добра посетеност од љубителите на одбојката и спортските ветерани од повеќе градови во Македонија.
