Кристијан Смилев не успеа да избори пласман во финалето на Светското првенство во Краков за јуниори и натпреварувачи до 23 години, откако полуфиналната трка ја заврши на 30. место.
Македонскиот кајакар заостана 104 секунди зад победникот Килијан Каединг од Германија, но пресудни за ваквиот епилог беа грешките на осмата и 16. капија, поради кои доби вкупно 100 казнени секунди. Без тие казни, Смилев ќе обезбедеше пласман во финалето на Светското првенство.
Смилев претходно имаше одличен настап во квалификациите, каде го освои 20. место и обезбеди место меѓу 30-те најдобри јуниори во светот. Сепак, двете грешки во полуфиналето ги урнаа неговите шанси за борба за медал.
И покрај разочарувачкиот крај на настапот, пласманот во полуфиналето претставува значаен успех за младиот македонски репрезентативец на светскиот шампионат во Краков.
