Нова сезона, нов предизвик за велешкиот ракометен клуб Гемиџии. По минатогодишното деби во пионерската конкуренција, клубот оваа сезона за првпат ќе има свој претставник и во кадетската машка ракометна лига.
Според распоредот објавен од Ракометната федерација на Македонија, сезоната во кадетската конкуренција стартува викендов, на 19 и 20 септември. Во лигата ќе настапуваат 16 екипи, поделени во две групи.
Гемиџии се најдоа во групата Б, заедно со Младост Богданци, Македонија Ѓорче Петров, Текстилец, Преспа, Струга, Куманово и Радовиш. Велешани првиот натпревар во новата сезона ќе го одиграат во недела, од 13 часот, во Скопје, каде што ќе гостуваат кај Македонија Ѓорче Петров.
За Гемиџии ова ќе биде уште еден важен чекор во развојот на клубот. Откако минатата сезона како нов клуб дебитираше во пионерската лига, велешкиот состав сега прави чекор погоре и влегува во кадетското натпреварување.
За велешките ракометари, првиот тест доаѓа веднаш на стартот, гостување во Скопје и можност кадетите на Гемиџии да покажат што научиле и колку можат да се носат со конкуренцијата во новата категорија.
