Тројца жители на Чашка и Велес се лишени од слобода откако полицијата кај местото „Присој“, во атарот на село Теово, открила товарно возило натоварено со огревни дрва без соодветна документација.
СВР Велес информира дека на 7 октомври околу 15:10 часот, полициски службеници од Полициското одделение Чашка и Отсекот за економски криминал при СВР Велес ги лишиле од слобода Б.Н.(53) од Лисиче, С.К.(33) од Горно Врановци и Б.К.(57) од Велес.
При контролата било затекнато товарно возило „МАН“ со велешки регистарски ознаки, натоварено со огревни дрва. Дел од дрвата биле без жиг, додека другите биле обележани со жиг.
Според полицијата, Б.Н. и С.К. не поседувале соодветна документација за дрвата, а за дел од обележаните дрва бил користен службен „чекан“ кој наводно им го дала Б.К., вработена во ЈП „Национални шуми“, подружница „Бабуна“ – Велес.
За случајот бил известен јавен обвинител. Дрвата и останатите предмети биле одземени, а по целосното расчистување и документирање на случајот ќе бидат поднесени соодветни пријави.
