На едно четиричлено семејство во октомври му се потребни најмалку 70.358 денари за покривање на основните месечни трошоци, покажува Синдикалната минимална кошница на Сојузот на синдикатите на Македонија (ССМ). Во споредба со септември, вредноста на кошницата е зголемена за 926 денари.
Најголем дел од семејниот буџет оди за храна и пијалаци, за кои се потребни 26.170 денари месечно. Дополнителен товар се трошоците за домување, па за четиричлено семејство кое живее во изнајмен стан од 60 квадратни метри, вкупните месечни потреби достигнуваат 85.733 денари.
Разликите во пресметките на трошоците за живот се забележуваат и меѓу институциите. Министерството за економија и труд за август објави потрошувачка кошница од 58.475 денари, додека синдикалната за истиот месец изнесуваше 68.675 денари. Разликата меѓу двете пресметки беше 10.200 денари, а само кај храната и пијалаците изнесуваше околу 3.900 денари.
Споредбата со почетокот на годината покажува дека трошоците за живот бележат постојан раст. Во јануари, синдикалната минимална кошница изнесувала 66.413 денари, а во октомври достигна 70.358 денари, што е зголемување од 3.945 денари за десет месеци.
Растот е забележлив и кај основните прехранбени потреби. Трошоците за храна и пијалаци од 24.211 денари во јануари се зголемиле на 26.170 денари во октомври, односно за 1.959 денари.
Податоците покажуваат дека на семејствата им се потребни сè повеќе пари за покривање на основните месечни потреби, при што храната останува најголемата ставка во домашниот буџет.
