Екипата на Башкими од Горно Јаболчиште утре ќе го отвори второто коло во Третата фудбалска лига – регион 4. Во населба Чашка, со почеток од 16 часот, Башкими ќе ги одмери силите со Победа од Пепелиште.
По поразот во првото коло од минатогодишниот второлигаш Големо Коњари, тимот од Горно Јаболчиште ќе има можност да стигне до првите бодови во новата сезона. Победа, пак, во првото коло го совлада Питу Гули со 3:0.
Во недела на терен ќе излезат и двете велешки екипи. Превалец на домашен терен ќе ја пречека екипата на Ултрас, во натпревар во кој велешани ќе се обидат да стигнат до првата победа сезонава. Средбата започнува во 16 часот. Во истиот термин, Борец 1919 ќе гостува во Крушево кај Питу Гули. По успешниот старт и победата во првото коло, велешкиот состав ќе се обиде да ја продолжи победничката серија и од гостувањето да се врати со нови три бода.
Второто коло носи нови предизвици за велешките претставници, а борбата за бодови во Третата фудбалска лига – регион 4 продолжува уште на самиот почеток од сезоната.
