Екипата на Борец успешно ја одбрани шампионската титула на Детскиот фудбалски турнир 2026, откако во драматичното финале го совлада Осогово од Крива Паланка по изведување пенали и уште еднаш се искачи на победничкиот пиедестал.
Завршницата на турнирот, кој цела недела се одржуваше на спортскиот терен во Градскиот парк во Велес, донесе возбудливи натпревари, многу голови и одлична атмосфера. Турнирот, организиран од Општина Велес во соработка со фудбалскиот тренер Панче Нанев, привлече големо внимание од љубителите на детскиот спорт и младинскиот фудбал.
Во првото полуфинале, Борец убедливо го совлада Њу Старс со 3:1 и обезбеди место во големото финале. Во вториот полуфинален натпревар, Осогово од Крива Паланка беше подобар од Тополка со 5:1.
Натпреварот за третото место донесе неизвесна борба меѓу Њу Старс и Тополка. По израмнетата игра, победникот беше решен на пенали, каде што Њу Старс славеше со 3:2 и го освои третото место на турнирот.
Во финалниот дуел, Борец и Осогово одиграа неизвесен натпревар во кој немаше победник во регуларниот дел, па шампионот беше одлучен по пенал рулетот. Поголема присебност покажаа младите фудбалери на Борец, кои триумфираа со 2:0 на пенали и ја одбранија титулата освоена минатата година.
Со свеченото доделување на пехарите и медалите беше спуштена завесата на уште едно успешно издание на Детскиот фудбалски турнир, кој и годинава потврди дека претставува еден од најзначајните спортски настани за младите фудбалери во Велес и пошироко.
