Со стил и без дилеми, велешкиот одбојкарски состав Виола Волеј го направи својот прв историски исчекор во Купот на Македонија за жени. Во претколото од националното куп-натпреварување, Виола Волеј на гостински терен ја совлада екипата на Јанта волеј со убедливи и максимални 3:0, обезбедувајќи пласман во следната фаза.
Ова беше прв настап на велешанки во Купот на Македонија, а воедно и прва официјална победа во ова натпреварување, што ѝ дава посебна тежина на овој успех. Со сигурна игра, дисциплина и контрола во сите три сета, Виола Волеј не ѝ остави простор на домашната екипа за изненадување.
Победата е потврда за напредокот и амбициите на клубот, кој со секој натпревар гради препознатлив стил и самодоверба. За Виола Волеј, овој триумф не е само пласман понатаму, туку и убаво запишана страница во клупската историја.
