Заклучно со 8:30 часот утринава, на територијата на државата е евидентиран еден активен пожар, додека пет други пожари се ставени под контрола, информира Центарот за управување со кризи (ЦУК).
Активниот пожар се наоѓа на подрачјето на Општина Кавадарци, во близина на Тиквешкото Езеро, каде што гори нискостеблеста шума и сува трева. Надлежните служби се ангажирани на терен и работат на целосно локализирање и гаснење на пожарот.
Во меѓувреме, вчера (29 август) околу 19:00 часот, полициски службеници од Одделението за внатрешни работи Кавадарци привеле две лица – З.К. (33) од село Бегниште и И.И. (19) од Кавадарци. Според информациите од Министерството за внатрешни работи, тие се сомничат дека намерно предизвикале пожар во реонот на месноста Блато, кај Тиквешко Езеро, во атарот на селото Куманичево.
Се работи на расветлување на случајот, а против осомничените ќе бидат поднесени соодветни пријави. Властите апелираат до граѓаните да бидат внимателни и одговорни, особено во екот на летната сезона, кога ризикот од пожари е значително зголемен.
