Македонската ракометна репрезентација остави силен впечаток на Светското првенство, остварувајќи извонреден настап против фаворизираниот тим на Унгарија. Иако не успеаја да дојдат до победата, која беше на дофат, ремито од 27-27 сепак е резултат кој може да послужи како мотив за идните предизвици.
На теренот беше присутна вистинска лавовска борба, каква што се очекуваше од избраниците на Кирил Лазаров. Нашите ракометари беа исполнети со огромна енергија и мотивација, а во целост го почувствуваа ентузијазмот од трибините. Вараждинската арена беше обоена во црвено-жолто, создавајќи незаборавна атмосфера која ја потврди љубовта и гордоста на секој Македонец.
На голот, Никола Митревски се истакна со 12 одбрани, потврдувајќи го својот статус како еден од најдобрите во тимот.
Нашите момци одлично го започнаа натпреварот. Унгарија во првите седум минути имаше силен старт, водеше со 5-2, а четирите гола беа дело на Илиќ. Но, тоа не ја поколеба Македонија, напротив – Митревски изведе неколку важни одбрани и со поддршка од верните навивачи, репрезентацијата одговори со серија од 5-0, преземајќи водство од 5-7 во 13-тата минута. Македонија продолжи со одлична игра, а со два гола на капитенот Кузмановски, предноста нарасна на 6-10.
Во текот на првото полувреме, на неколку пати Унгарија се обиде да се врати во игра, но нашите ракометари успеваа да ја задржат предноста. Сепак, во клучните моменти, на моменти недостасуваше прецизност во нападот, а некои од шутевите не завршија во голот, што го искористија Унгарците да израмнат резултатот на 14-14, по што следуваше пауза за полувреме.
Во второто полувреме, натпреварот продолжи во сличен ритам – гол за гол. Унгарија го презеде водството, но Македонија продолжи со храбра игра. Кузмановски и Велковски беа важни фигури во нападот, додека Митревски блескаше на голот, спречувајќи многу обиди на противникот. Во 40-та минута, Унгарија остана без својот клучен играч, Золтан Жито, кој заработи директен црвен картон, а ова го искористи Кузмановски за ново водство на Македонија.
Резултатот беше тесен и неизвесен до последните моменти. Во 53-та минута, Јагуриновски израмни на 24-24, а неколку важни одбрани на Митревски дозволија да се дојде до резултат 25-26, кога Јагуриновски постигна гол за минимална предност на Македонија. Митревски повторно го задржа тимот во игра, но Унгарија не се предаде и успеа да израмни на 27-27.
На крајот, Македонија имаше шанса да дојде до победата, но ударот на Кузмановски од слободен удар не заврши во мрежата. Резултатот на крајот беше фер и завршен со реми, но без сомнение, ова беше извонреден настап кој ќе остане запишан како една од најхрабрите изведби на македонскиот ракометен тим.
