Двајца велешани на возраст од 42 и 36 години се меѓу шесте лица кои биле приведени по физичка пресметка што се случила синоќа за време на јавен настан во охридското село Пештани.
Според информациите од СВР Охрид, настанот се случил на 28 август околу 23:35 часот, за време на концертот на кој настапувала Сузана Гавазова. Покрај двајцата велешани, приведени биле и двајца жители на Пештани на возраст од 52 и 45 години, 21-годишник од Битола и 19-годишник од Прилеп.
Поради нарушувањето на јавниот ред и мир и меѓусебната физичка пресметка, интервенирала полицијата. Во текот на интервенцијата, просторот бил дополнително осветлуван со рачни електрични ламби за полицајците непречено да ја спроведат постапката.
Поради полициската интервенција, во тие моменти бил прекинат и концертот.
Од СВР Охрид информираат дека по целосното документирање на настанот, против сите шест лица ќе бидат поднесени соодветни пријави.
