Жителите на Општина Градско уште еднаш го потврдија својот хуман дух, дарувајќи вкупно 99 крвни единици на втората крводарителска акција оваа година. Петмина од дарителите се приклучија за прв пат, што дополнително ја истакнува важноста на солидарноста и граѓанската свест во оваа заедница.
Акцијата се одржа вчера, на 10 август во просториите на Домот за култура „Крсте Петков Мисирков“ во Градско. Истата беше реализирана во соработка помеѓу Општинската организација на Црвениот крст – Велес и Институтот за трансфузиона медицина од Скопје. Во организацијата активно учествуваа и пет волонтери од Основната организација на Црвениот крст од Градско, кои обезбедија непречен тек на акцијата и поддршка за дарителите.
Ова е втора крводарителска акција во Градско за 2025 година. На првата, одржана претходно годинава, беа собрани 96 крвни единици, што говори за континуираната посветеност на граѓаните кон спасување животи.
