Хуманитарна оперска гала вечер за поддршка на лицата со попреченост ќе се одржи во сабота, на 20 декември 2025 година, во Театарот „Јордан Хаџи Константинов – Џинот“ во Велес, со почеток од 19 часот.
Настанот го организира Здружението на лица со церебрална парализа и други попречености од Велес, овластен и лиценциран давател на социјалната услуга „Живеење со поддршка“. Гала вечерта е прв настан од кампањата „Заедно за нов дом“, која ќе се реализира во текот на 2026 година, со цел запознавање на јавноста со услугата „Живеење со поддршка“ и проширување на нејзините капацитети преку отворање на четири нови мали групни домови.
Во предновогодишна атмосфера, публиката ќе има можност да ужива во настапите на еминентни македонски оперски уметници: сопранистките Полина Тасева, Вариса Хајдарпашиќ, Вероника Караколева и Магдалена Тодоровска, тенорот Влатко Груевски и бас-баритонот Дарко Тодоровски. Уметниците ќе настапат во придружба на пијанистките Фросина Џини и Андреј Наунов, кој воедно ќе биде и диригент на вечерта.
Целосниот приход од продажбата на влезниците е наменет за поддршка на корисниците на услугата „Живеење со поддршка“, која овозможува независно живеење во станбени единици со 24-часовна поддршка од стручни лица и негуватели, како и помош во секојдневните активности, социјализација и интеграција во заедницата.
Донациските влезници се по цена од 1.000 денари и може да се набават во билетарата на Театарот „Јордан Хаџи Константинов – Џинот“, како и од Здружението на лица со церебрална парализа и други попречености од Велес.
