Актуелниот градоначалник на Велес Марко Колев од коалицијата „Твоја Македонија“ предводена од ВМРО-ДПМНЕ, оствари убедлива победа уште во првиот круг од локалните избори. Според податоците од Државната изборна комисија, по обработени 100% од гласачките ливчиња, Колев освои 73,34% или 13.992 гласа, со што зад себе ги остави противкандидатите со значителна разлика.
Кандидатката на СДСМ, Маја Хеско, освои 15,99% или 3.050 гласа, додека Маријана Деловска од Демократи доби 2,45% или 468 гласа. Со ова, Колев ја обезбедува својата втора градоначалничка функција, а ВМРО-ДПМНЕ го потврдува приматот во Велес и на локално ниво.
Во изборот за Совет на Општина Велес, од исто така обработени 100% од гласачките ливчиња, распределбата на мандатите останува непроменета. Најмногу мандати освои ВМРО-ДПМНЕ — 16 советници со 54,56% или 10.410 гласа. По нив следат Левица со 3 мандати и 13,59% (2.592 гласа), СДСМ со 3 мандати и 13,08% (2.496 гласа), како и Движењето ЗНАМ со 1 мандат и 4,90% (935 гласа).
Останатите партии, меѓу кои Национална алијанса за интеграција (2,59%), ВЛЕН (1,20%), Бошњачки демократски сојуз (1,77%), ДПТМ (0,74%), Единствена Македонија (0,55%) и МААК (0,70%), не успеаја да обезбедат советничко место.
Со ваквите резултати, ВМРО-ДПМНЕ го зацврстува мнозинството и во Советот, обезбедувајќи стабилна локална власт во новиот мандат.
