Вчера вечерта, на 1 јули, околу 20:15 часот, на крстосницата помеѓу улиците „Благој Ѓорев“ и „Невена Георгиева-Дуња“ во Велес, се случила сообраќајна несреќа во која учествувале патничко возило и мотоцикл.
Според информациите од СВР Велес, во несреќата учествувало возило марка „Пежо“ со скопски регистарски таблички, управувано од 44-годишниот О.Х.Т. од Велес, и мотоцикл марка „Априлија“ со велешки таблички, управуван од 32-годишниот В.С., исто така од Велес.
Во судирот, со тешки телесни повреди се здобил возачот на мотоциклот, кој веднаш бил пренесен во Општата болница во Велес, каде што му била укажана медицинска помош и му биле констатирани повредите.
На местото на настанот извршен е увид од страна на увидна екипа на СВР Велес, а причините за несреќата се сè уште предмет на истрага.
