Новата учебна година денеска започна за околу 6165 ученици во основните и средните училишта во Велес и велешко. Од нив, 4.095 се основци, додека 2.070 средношколци а за првпат во училишните клупи седнаа 376 првачиња.. Наставата за сите ученици ќе трае до 10 јуни, додека матурантите ќе ја завршат учебната година на 17 мај.
Според Министерството за образование и наука, обезбедени се учебници за сите ученици, а годинава се набавени 622.000 примероци. Целосно нови учебници се обезбедени за прво, второ и трето одделение, како и за осмо одделение и втор клас во гимназиското образование, каде што ќе се учи според нови наставни програми.
Министерката Весна Јаневска информираше дека годинава ќе има 433 паралелки помалку – 222 помалку во основното образование и 211 во средното поради припојување на паралеки со по неколку ученици односно реорганизирање на наставата. Поради тоа што немаат запишано ученици, од септември привремено се затвораат 26 подрачни училишта, а вкупно 148 се празни училишни објекти во државава, претежно во руралните средини.
