Во пресрет на 24 Мај – Денот на сесловенските просветители Свети Кирил и Методиј, Општина Велес ја продолжува традицијата на оддавање признание на најуспешните просветни работници и најталентираните ученици од основното и средното образование во градот.
Годинава, признанието за најдобар просветен работник во одделенска настава го доби Андријана Јорданова, додека за најдобар наставник во предметна настава е избрана Бојанка Џипунова-Ташова. Во категоријата средно образование, наградата ѝ припадна на Елизабета Николовска.
Општината ги награди и најталентираните ученици, а признанијата годинава ги добија Марија Талевски од основното и Лука Коциќ од средното образование.
Со оваа традиционална манифестација, Општина Велес уште еднаш ја истакнува важноста на образованието, посветеноста на наставниот кадар и успехот на младите таленти кои се гордост на градот.
