Велес доби нова ракометна приказна, формиран е ракометниот клуб РК Гемиџии Спорт 2025, кој со својата визија и енергија ветува светла иднина за младиот спортски потенцијал во Велес. Под водство на младите, но веќе докажани тренери Сашко Радевски и Никола Василев, клубот има за цел да создава и развива нови генерации на ракометари кои во иднина ќе бидат столб на сениорскиот тим.
Во почетната фаза, РК Гемиџии Спорт 2025 ќе се натпреварува во пионерска конкуренција, во групата „Б“, заедно со неколку од најперспективните клубови во земјава: Еурофарм Пелистер 2, Куманово, Радовиш, Алкалоид, Македонија Ѓорче Петров, Младост Богданци, Тиквеш, Шампион и Бисинов. Ова е идеална можност за младите велешани да се калибрат и стекнат со драгоцено искуство уште од најрана возраст.
Тренинзите на главната селекција се одржуваат во спортската сала на ООУ „Блаже Конески“, додека најмладите групи тренираат во училишните сали на ООУ „Панко Брашнаров“ и ООУ „Васил Главинов“.
Со јасна визија, стручна работа и ентузијазам, РК Гемиџии Спорт 2025 претставува значаен чекор кон зацврстување на ракометната база во Велес и отвора ново поглавје за сите љубители на овој спорт.