Во рамки на третото коло од Третата фудбалска лига – Југ, денеска фудбалската јавност во Велес со нетрпение го очекува првото локално дерби сезонава. На теренот во велешката населба Превалец ќе се сретнат екипите на Тополка и Борец 1919, во натпревар кој носи дополнителна тежина поради ривалството и локалниот карактер.
Тополка во првите две кола одигра натпревари на гостински терен и освои еден бод, додека Борец 1919 по стартниот пораз од Росоман, се врати на победничките патеки со убедлива победа од 4:0 против Влазними Јуниор. Натпреварот во Превалец е шанса за двете екипи да ги консолидираат своите позиции на табелата, но и да докажат кој моментално е подобар на локалната сцена.
Од останатите велешки претставници во лигата, екипата на Башкими од село Горно Јаболчиште ќе гостува во крушевското село Бучин, каде ќе се обиде да дојде до нови бодови. Тимот на Превалец ова коло е слободен.
Натпреварот меѓу Тополка и Борец 1919 започнува од 15 часот, а љубителите на фудбалот од Велес и околината се очекува во голем број да присуствуваат и да создадат вистинска спортска атмосфера.
