Синдикатот на Полиција во Македонија (СПМ) остро реагира на неодговорното и неетичко однесување на медиумите, обвинителството и политичарите, кои го нарушуваат основното правно начело на пресумпција на невиност. Во своето последно соопштение, СПМ апелира на целосно почитување на правата на обвинетите во судските постапки и повикува на доследно применување на меѓународните стандарди за правично и фер судење.
Синдикатот ја истакнува загриженоста за практиките на брзо судење на јавноста преку медиумите, кои објавуваат недоволно проверени и често неточни информации за осомничените, што доведува до создавање на лажна слика и штетни последици по нивните права. СПМ бара одговорност и професионализам од сите вклучени страни во овој процес и повикува на враќање на вистинскиот професионализам во полициската и правосудната работа.
Во продолжение целиот текст:
Начелото на пресумпција на невиност треба доследно да биде почитувано во судските постапки‼️
Синдикат на Полиција во Македонија – СПМ ја истакнува својата загриженост за постапувањето на ОЈОГОКК, новинарите и претставниците на Министерството за внатрешни работи а во насока на несоодветното применување на начелото на пресумпција на невиност што е спротивно на Законот за кривична постапка и тоа со последните случувања што ја брануваат јавноста каде во неколку случаи се осомничени полициски службеници.
Начелото за пресумпција на невиност бара „inter alia“ при извршувањето на своите должности, односно споменатите да не започнуваат со предрасуди дека обвинетото лице го сторило делото за кое што е обвинето, товарот на докажувањето е на обвинителството и секое сомневање треба да биде во корист на обвинетото лице.
Во Уставот на Република Македонија, членот 13 вели: „Лицето обвинето за казнено дело ќе се смета за невино сé додека неговата вина не биде утврдена со правосилна судска одлука“. Освен што ова начело е предвидено во највисокиот правен акт на нашата држава, истото е предвидено и во Европската конвенција за човекови права (во понатамошниот текст: ЕКЧП) во членот 6 „Секој обвинет за кривично дело има право да се претпоставува дека е невин сé додека не се докаже неговата вина во согласност со законот на јавно и фер судење, на кое тој ги има сите гаранции неопходни за неговата одбрана“.
Имено, членот 5 од Законот за кривична постапка предвидува дека „Лицето обвинето за кривично дело има право на правично и јавно судење пред независен и непристрасен суд да ги изнесе сите докази во негова корист и да го оспорува обвинението“.
Ова го темелиме врз основа на праксата во Европскиот суд за човекови права каде во неколку случаи судот смета дека пресумпцијата на невиност според членот 6 е нарушена ако судска одлука или изјава на јавен службеник односно судија во врска со лице обвинето за кривично дело одразува мислење дека тој е виновен пред тоа да биде докажано според закон.
Најважно од се, новинарите се очите и ушите на јавноста. Тие се оние кои примаат илјадници информации со цел да ја издвојат најважната и пред сѐ вистинита, за да им ја презентираат на граѓаните. Но, некои новинари веруваат дека и самите факти се помалку важни од приказна која се „продава“. Таквите приказни кои најчесто известуваат за судски процеси, содржат и бројни недоследности, штуро објаснети и често неточни информации за целиот спор, со што се бранува јавноста и се создава невистинита слика за вклучените страни во спорот, како и за судството. Медиумите кои се главно средство за информирање на граѓаните за криминалот во државата често и несвесно ја прекршуваат презумпцијата на невиност.
Секој е невин додека не се докаже спротивното‼️
Тука се поставува прашањето: Колку од сите „приказни“ што се пласираат во јавноста се точни, дали е проверена нивната веродостојност, дали се проверливи фактите и дали има докази со кои се изнесуваат пред јавноста? Или најбитно е да се има гледаност и да се забавува публиката?
ЗАР ТОА Е ПРОФЕСИОНАЛНО НОВИНАРСТВО?
Граѓаните веќе се навикнати и сметаат дека е најнормално објавување на имиња и слики на сѐ уште неосудени лица, снимки од апсења, како и прикажување на било какви лични податоци на граѓани преку текстови на портали или пренесувања на телевизија. Реакцијата на јавноста многу често е осуда кон обвинетото лице како резултат на нецелосното и непрофесионално однесување на одредени медиуми.
Колку медиуми во конкретниот случај го прекршија и непочитуваа ова право? За што, за да продадат по секоја цена приказна да биде читана пред нивните гледачи- читатели? Зар овие лица немаат фамилии, роднини, пријатели? Што доколку излезат невини, како ќе се чуствувате Вие како новинари, обвинители и политичари?
Поради сето погоре наведено, Синдикат на Полиција во Македонија најстрого ја осудува оваа интервенција и неетичко однесување на медиумите, обвинителството и политичарите и апелира во иднина доследно да се почитуваат правата на обвинетите и осомничените во судските постапки и да се имплементираат меѓународните стандарди за фер и правично судење. Во таа насока, судот е оној орган кој што треба да се грижи за правата на обвинетите во постапката по службена должност и во ниту еден момент не смее да остави сомнеж за пристрасно водење на постапката.
Затоа апелираме и бараме надлежните органи да преземат конкретни мерки и да прекине конечно овој „циркус“ на црнење на полициската професија пред јавноста.
ДА ЗА КРИМИНАЛЦИТЕ ВО ЗАТВОР, но прво да се докаже тоа во постапка.
Враќање на ПРОФЕСИОНАЛИЗМОТ на вработените во МВР!
