Спасувачките екипи продолжуваат со потрагата по преживеани и исчезнати лица по катастрофалните поплави што го погодија пограничниот регион меѓу Непал и кинески Тибет.
Според најновите информации, во Непал се потврдени 359 загинати, додека повеќе од 1.000 лица се водат како исчезнати во Непал и Тибет. Меѓу исчезнатите има повеќе од 650 странски државјани, туристи и верници кои се наоѓале во регионот.
Катастрофата започнала откако маса мраз и карпи се урнала во планинска река, предизвикувајќи огромен бран вода, кал и камења кој се спуштил низ долините. Поплавата уништила цели населби, патишта, мостови и друга инфраструктура на двете страни од границата.
Непалските власти ги засилија спасувачките операции, а армијата користи хеликоптери за доставување храна, шатори и друга помош до местата кои се отсечени поради уништените патишта и мостови. Повеќе од 5.000 припадници на армијата и полицијата се ангажирани во потрагата по преживеани.
Меѓу оние кои успеале да преживеат е 24-годишниот Бибек Кумал, работник кој во моментот на поплавата копал јама за тоалет во градот Бидур.
Кумал за Reuters раскажал дека слушнал силен звук и дека неговите колеги му викале да избега. Тој успеал да излезе од јамата и почнал да трча, но набргу бил погоден од огромен бран вода, кал и камења.
„За среќа, се заглавив во едно дрво од манго. Да немаше дрво од манго, ќе ме однесеше водата и ќе умрев“, раскажал Кумал, кој при поплавата се здобил со повреда на ногата.
Тој бил спасен од полицијата и пренесен на лекување во Катманду. Кумал е меѓу повеќе од 114 лица кои биле спасени и пренесени во болници.
Во меѓувреме, кинеските власти соопштија дека во Тибет се водат како исчезнати 558 лица, меѓу кои 260 странски државјани. На кинеска страна досега се потврдени три смртни случаи.
Кинескиот премиер Ли Чијанг пристигна во погодениот регион Ѓиронг за да ја координира реакцијата на властите. Кинеските спасувачки екипи и воените сили се ангажирани во евакуацијата и потрагата по исчезнати лица.
Дополнителен ризик претставува и природна брана со езеро во близина на погодениот регион. Кинеските власти предупредија дека доколку дојде до нејзино пробивање, може да следува нов голем бран и дополнително да се загрозат спасувачките операции.
Од меѓународната заедница веќе пристигнува помош за Непал. Индија испрати речиси 50 тони материјали за итна помош, Велика Британија вети 5 милиони фунти, а САД испратија советник за реакција при катастрофи и обезбедија 500.000 долари помош. Европската Унија, Обединетите нации и други организации исто така најавија дополнителна поддршка.
Спасувачките операции продолжуваат, додека властите стравуваат дека бројот на жртви и исчезнати може дополнително да се зголеми.
