Непознато лице успеало да измами 88-годишна велешанка, која останала без заштедите откако поверувала во измислена приказна дека нејзината ќерка предизвикала тешка сообраќајна несреќа. Според пријавата во СВР Скопје, повикот на нејзиниот фиксен телефон се случил на 27 август околу 10 часот. Машко лице ѝ кажало дека ќерка ѝ прегазила четиригодишно дете и дека за да избегне затворска казна мора да плати 50.000 евра.
Жената одговорила дека нема толкав износ и дека располага со 2.700 евра. Потоа добила инструкции парите да ги донесе во кругот на Градската општа болница „Св. Наум Охридски“ во Скопје.
„Вчера (29.08.) во СВР Скопје Д.Г. (88) од Велес пријавила дека на 27.08.2025 година околу 10:00 часот на нејзиниот фиксен телефонски број добила повик од непознато машко лице кое ја известило дека нејзината ќерка наводно имала сообраќајна несреќа во која што како учесник прегазила четиригодишно дете и дека доколку сака да ја спаси од долгогодишна затворска казна треба да му даде 50.000 евра. Откако пријавителката рекла дека нема толку пари, односно дека има околу 2.700 евра добила „инструкции“ од лицето парите да ги донесе во Скопје во близина на Градската општа болница „Св. Наум Охридски“, што пријавителката и го сторила. Околу 11:50 часот пријавителката пристигнала во кругот на болница и по насоки на лицето кесата со парите ја оставила во една од кантите за отпадоци а потоа со автобус се вратила во Велес“, се вели во полицискиот билтен.
Од полицијата велат дека се работи на откривање на измамниците и расветлување на случајот.
