Едногласната поддршка од 300 членови на органите, телата и гранските синдикати беше упатена за одлуката пратениците да ја намалат својата плата на 500 евра, сè додека не се зголеми минималната плата. Ова беше главната тема на првата јавна седница на ССМ, која се одржа пред Парламентот, а на која беше јасно посочено дека „не може да има привилегии за пратениците, а да нема за работниците“.
За време на разгледувањето на дневниот ред, ниту еден пратеник не се појави, а првиот синдикален лидер, Слободан Трендафилов, ги предизвика пратениците со коментарот дека „тие се 300, а пратениците се само 120“, алудирајќи на бројката на пратеничката група. Трендафилов, исто така, се интересираше дали во Собранието присуствува пратеникот од ВМРО-ДПМНЕ, Бране Петрушевски, кој во последно време беше еден од најгласните критичари на синдикалните активности.
„Пратениците во Собранието избрани од работниците да го предложат и гласаат предлогот на ССМ за дополнително зголемување на минималната плата за 6.000 денари, како и зголемување на сите останати плати во приватниот сектор со зголемувањето на минималната плата. Не гласајте закони со кои се намалуваат работничките права на штета на работниците, онака сложно како што не гласаате закони за намалување на вашите привилегии. Вашите сега 79 отсто зголемени плати не ги заслужувате и затоа дојдовме тука поради фактот што вие не одлучувате за нас, ние ќе одлучиме за вас – рече претседателот на ССМ, Слободан Трендафилов.
Пред почетокот на првата отворена седница, синдикалците се собраа пред Работничкиот дом, каде едногласно го усвоија дневниот ред. Тие соопштија дека е „12 часот и пет минути“, што симболизираше актуелноста на барањата на работниците. Претседателот на ССМ, Слободан Трендафилов, се осврна на жестоките напади што раководството и членовите на синдикатот ги доживуваат во последно време, само поради тоа што не беше прифатено нивното барање за зголемување на минималната плата, како и зголемување од 100 евра на сите други плати. Во знак на почит, сите присутни застанаја во едноминутно молчење за трагично загинатите во пожарот во Кочани.
Протестната прошетка на синдикалците продолжи пред Стопанската комора, каде беше истакнато мотото дека „подадената рака на работникот денес, може лесно да се претвори во стисната тупаница утре“. Тие ја испратија пораката до претставниците на Стопанската комора, апелирајќи да ја прифатат подадената рака на работниците и да го поддржат зголемувањето на платите, како начин за задржување на квалификуваните работници во Македонија.
„Постојано слушаме дека нема доволно работна сила, а најмалку 15.000 работници и граѓани ја напуштаат Македонија секоја година, па доколку не се зголемат платите, Вие ќе бидете главниот виновник за егзодусот на работниците од Македонија – истакнаа од ССМ.
Последната станица на протестниот марш беше Владата, каде истакнаа дека „Не може да се одлучува за нив, а без нив“.
„Владата да застане на страна на работниците, да престане да одлучува еднострано на штета на работниците, да го почитува социјалниот дијалог и да ги запре нападите кон синдикатите и обидите да се замолчат работниците. Владата како најголем работодавач, да ги зголеми платите на вработените во јавниот сектор согласно Општиот колективен договор за јавен сектор, гранските колективни договори, колективните договори на ниво на работодавач, како и да ги усогласи со минималната плата согласно посебните закони – истакна Трендафилов.
Од ССМ ги повикаа работниците наместо да уплаќаат туристички патувања, да им се придружат на Првомајскиот протест и да се изборат за нивните плати за достоинствен живот.
