Младиот кајакар од Велес, Кристијан Смилев, ја имаше честa да биде знаменосец на свеченото отворање на Европскиот младински олимписки фестивал (EYOF) Скопје 2025 – најголемиот мултиспортски настан досега организиран во Македонија.
Фестивалот, кој официјално започна вчера, ќе трае до 26 јули и ќе обедини околу 4.000 млади спортисти од 50 европски земји. Програмата вклучува седум дена исполнети со натпревари, културни активности и промоција на олимписките вредности како што се почит, пријателство и извонредност.
Во центарот на вниманието беше величествената Парада на делегациите, на која продефилираа спортисти од сите 49 земји учеснички, како и ЕОК тимот на бегалци. Илјадници млади спортисти на возраст од 14 до 18 години маршираа низ арената со своите национални знамиња, носејќи порака за заедништво и европска иднина. Делегациите беа пречекани со аплаузи и топло добредојде од публиката.
ЕМОФ Скопје 2025 вклучува натпревари во 15 спортски дисциплини: атлетика, пливање, кошарка, баскет 3×3, ракомет, одбојка, џудо, гимнастика, велосипедизам, маунтајн бајк, кајак слалом, бадминтон, стрелаштво, пинг-понг и теквондо. Натпреварите ќе се одвиваат на современи спортски објекти во Скопје и Куманово, а натпреварите во гимнастика ќе се одржат во Осиек, Хрватска.
Македонија на ЕМОФ Скопје 2025 ќе ја претставуваат околу 200 млади спортисти, што е најголем контингент досега. За успешна реализација на настанот се ангажирани стотици волонтери, како и целосен организациски тим кој со месеци наназад работи на подготовка на секој детал.
Настаните во кајак слалом ќе се одржат на Спортскиот центар „Матка“, каде што Смилев ќе има шанса да се натпреварува пред домашна публика. Преносот на овие трки ќе го овозможи велешката видео продукција Live Streaming Production, овозможувајќи илјадници гледачи да го следат натпреварувањето во живо.
