Агенцијата за храна и ветеринарство изрече 15 забрани за вршење дејност на оператори со храна, во рамки на 445 инспекциски контроли спроведени во изминативе десетина дена.
Како небезбедни, запленети и уништени се 696 килограми храна со сомнителен квалитет и потекло од непознати добавувачи. Исто така, 16 оператори немале имплементирано процедури за добра хигиенска и добра производствена пракса, а 32 немале спроведено задолжителен здравствен преглед на вработените. Тројца оператори не извршиле задолжителна дезинфекција, дезинсекција и дератизација, а седум објекти не ги исполнувале техничките услови за вршење дејност. Кај седум оператори е затечена и несоодветно означена храна, соопшти АХВ.
За утврдените неправилности изречени се парични казни за 77 оператори, во вкупна вредност од 36.470 евра во денарска противвредност. Издадени се и 103 решенија со наредби за отстранување на неправилностите, како и 23 опомени.
