Цените на нафтата нагло паднаа вчера вечерта откако американскиот претседател Доналд Трамп посочи дека конфликтот со Иран можеби завршува. По интервјуто за Си-Би-Ес њуз во кое Трамп рече: „Мислам дека војната речиси завршува“, цената на суровата нафта од типот Брент падна на 90 долари за барел, 30 долари помалку од претходната ноќ.
Тој, исто така, рече дека Иран „нема морнарица, нема комуникации“, „нема воздухопловни сили“ и истакна дека САД се далеку зад својата првична проценка за војна од четири до пет недели. Тој, исто така, рече дека размислува да ја преземе контролата врз Ормускиот теснец, клучен глобален пат за снабдување со нафта и гас што Иран во голема мера го блокираше.
Подоцна во понеделник, тој напиша на својата платформа Truth Social дека ако Иран дејствува на начин што ќе го спречи протокот на нафта низ Ормутскиот теснец, САД ќе „удрат дваесет пати посилно, отколку што го сториле досега“.
Стравот од прекини во снабдувањето ја крена цената на суровата нафта од типот Брент над 120 долари за барел во понеделник наутро, што е највисоко ниво од 2022 година. Сегашната цена останува повисока отколку пред почетокот на конфликтот, кога се тргуваше по околу 70 долари за барел.
Остриот пораст на цените на нафтата ги поттикна загриженостите за забавување на економскиот раст. Олеснувањето дојде во понеделник по извештајот дека групата Г7 од водечките западни индустријализирани земји размислува да ги искористи националните резерви на нафта за да помогне во стабилизирањето на пазарот.
