Борачкиот клуб „Борец“ викендов зеде учество на големиот меѓународен турнир во борење слободен стил „Победник“ 2025, кој се одржа во Белград. Натпреварувањето се реализираше во силна конкуренција за сениори и јуниори, со вкупно 173 учесници од 11 земји.
БК „Борец“ веќе неколку години по ред е дел од овој престижен турнир, на кој традиционално остварува запазени настапи и значајни резултати, потврдувајќи го континуитетот и квалитетот на клубот на меѓународна сцена.
На годинашното издание, велешките борачи се вратија со вредни пласмани. Левче Картинов го освои второто место, додека Давид Стојановски и Дамјан Донев се закитија со бронзени медали, освојувајќи трети места. Никола Бабунски и Марко Ќулумов го завршија турнирот на петтата позиција.
Од таборот на „Борец“ информираат дека клубот загубил и три полуфинални борби, што дополнително говори за силната конкуренција и за борбените настапи на нивните натпреварувачи.
Со учеството и постигнатите резултати на „Победник“ 2025, БК „Борец“ уште еднаш покажа дека е еден од препознатливите македонски претставници во борењето на меѓународни турнири.
