Во изминатите четири години не се евидентирани претставки за непотребни медицински интервенции, додека по сопствен наод Фондот има извршено девет контроли за приватно наплатени средства, велат од Фондот за здравствено осигурување по тврдењата на кардиологот Сашко Кедев дека во приватни болници непотребно се правеле операции само за профит.
Оттаму наведуваат дека, сепак, ФЗО нема законска надлежност да ја оценува медицинската оправданост на изведените интервенции, ниту да врши инспекциски надзор врз стручната работа на здравствените установи.
Овие надлежности велат се во доменот на Државниот здравствен и санитарен инспекторат или на специјални комисии формирани од министерот за здравство.
Претходно и Министерството за здравство информираше дека ќе се направат итни и вонредни контроли за да се добие јасна слика за состојбите во здравството.
