Пожар утрово избувна во продавницата за бела техника „Нептун“ во Велес, која се наоѓа во близина на Градскиот пазар. На местото веднаш интервенираше екипа на Територијалната противпожарна единица од Велес со противпожарно возило. Благодарение на брзата реакција на пожарникарите, огнот за кратко време беше ставен под контрола и изгаснат.
Пожарот се случил во објект лоциран меѓу станбени згради, поради што интервенцијата предизвика внимание кај жителите и случајните минувачи во овој дел од градот.
Засега нема официјални информации за причината за пожарот, ниту за евентуална материјална штета или повредени лица. Се очекува повеќе детали да бидат познати по увидот на надлежните служби.
