Вистинска драма попладнево се одвивала на автопатот Велес – Скопје, откако автобус со прилепски регистарски таблички избувнал во пламен во близина на патарината Отовица.
Според првичните информации, пожарот избувнал додека автобусот се движел во правец кон Скопје, предизвикувајќи вознемиреност кај возачите и патниците кои во тој момент поминувале по автопатот. Благодарение на брзата реакција, сите патници навреме го напуштиле возилото и, за среќа, нема повредени лица.
Од Министерството за внатрешни работи информираат дека веднаш по пријавата на местото биле испратени екипи на Територијалната противпожарна единица Велес, како и полициски службеници од Полициската станица за безбедност на патниот сообраќај Велес.
Поради интервенцијата и гаснењето на автобусот, сообраќајот на автопатот А1 на делницата Велес – Скопје, кај патарината Отовица, се одвивал отежнато. Од Авто мото сојузот на Македонија соопштија дека од 17:25 часот сообраќајот се пренасочувал и се одвивал по една коловозна лента.
