Денеска е Петковден, празник посветен на Света Петка Епиватска, една од најпочитуваните светици во православното христијанство. Во народот е позната и како Црна Света Петка, поради црната облека во која најчесто е прикажана на иконите.
Според христијанската традиција, постојат три светици со името Параскева, односно Петка. Првата е Света Параскева Римјанка, која се празнува на 8 август, втората е Света Параскева од Иконија, чиј празник се одбележува на 10 ноември, а третата е Света Петка Епиватска, позната и како Трновска, на која ѝ е посветен денешниот празник.
Света Петка Епиватска, според житието, била родена во Епиват, во близина на Цариград, кон крајот на 10 век. Нејзиното име Параскева е поврзано со грчкиот збор за петок, кој во еврејската традиција бил ден на подготовка за саботата.
Во народните верувања, Света Петка има посебно место како заштитничка на луѓето и нивниот дом. Верниците ѝ се обраќаат за здравје, благосостојба и заштита од несреќи, а во традицијата таа особено се поврзува со плодноста и заштитата на жените.
Петковден се одбележува со молитви и посети на храмовите посветени на светицата, а во многу семејства празникот се почитува како ден за духовен мир, семејно собирање и продолжување на старите обичаи.
