Пионерската екипа на Гемиџии од Велес продолжува со одличните настапи во групата Б од пионерската машка лига. Во натпревар од 7. коло, велешани славеа на гостувањето кај Либра со убедливи 7:27 (3:16).
Со оваа победа, Гемиџии го задржа максималниот ефект во досегашниот тек од сезоната, остварувајќи седум победи од седум натпревари и освојувајќи максимални 14 бодови.
Во победничкиот состав најефикасни беа Мартин Пранговски и Лука Коцевски, кои постигнаа по четири погодоци. Кај домашната екипа се истакна Никола Узунов, кој беше стрелец на шест од вкупно седумте гола на Либра.
Во следното, 8. коло, Гемиџии ќе игра на домашен терен против Младост, екипа која, исто така, сè уште нема пораз оваа сезона. Се очекува интересен дуел меѓу двата досега непоразени состави.
