Возење без возачка дозвола и натаму е чест прекршок на патиштата, а полициските контроли продолжуваат да откриваат несовесни возачи. Во текот на вчерашниот ден, полицијата приведе две лица кои управувале возила без да се стекнат со право на управување, при што им биле одземени и возилата.
Првиот случај е регистриран во 08:20 часот на локалниот пат меѓу селата Отиштино и Горно Оризари, во Општина Чашка. Полициски службеници од СВР Велес го лишиле од слобода М.А. (57) од селото Мелница, откако при сообраќајна контрола кај местото викано „крстосница Сливник“ било утврдено дека управувал патничко возило „Форд“ со велешки регистарски ознаки без да поседува возачка дозвола.
Истиот ден, во 22:50 часот, во Росоман, полициски службеници од ОВР Кавадарци го лишиле од слобода Р.Ш. (19) од Росоман, кој управувал мопед без регистарски ознаки, исто така без претходно да се стекне со право на управување.
По насоки на јавен обвинител, двајцата биле приведени во полициска станица, а возилата им биле одземени. По целосно документирање на случаите, против нив ќе бидат поднесени соодветни пријави.
