Пожар избувнал во кујната на кафаната „Шкорпион“ на улицата „Никола Карев“ број 33 во Велес, во неделата вечерта.
Како што информираат од Територијалната противпожарна единица Велес, дојавата за пожарот била примена на 28 јуни во 22:10 часот, по што веднаш биле испратени две противпожарни возила со шест пожарникари-спасители.
По пристигнувањето на местото на настанот било констатирано дека гори дел од кујната на објектот. Благодарение на брзата интервенција и ангажманот на пожарникарите, огнот бил ставен под контрола и целосно изгаснат за кратко време.
Од противпожарната единица посочуваат дека во кујната имало плински боци, но со навремената реакција било спречено нивно загревање и можна експлозија, со што била избегната поголема опасност.
Во интервенцијата нема повредени лица. Причините за избувнувањето на пожарот дополнително ќе се утврдуваат.
