Министерот за правда Ненад Вујиќ изјави дека Ратко Младиќ, кој вчера почина во Хаг, ќе биде погребан со највисоки државни и воени почести, а за местото на погребот ќе одлучи семејството на Младиќ. Ненад Вујиќ наведе дека ќе испрати допис до Механизмот во Хаг во врска со најавената истрага за смртта на генералот Младиќ, со очекување да се утврди не само причината за смртта, туку и дали Младиќ бил соодветно лекуван.
Министерот рече дека денеска ќе добие повеќе информации за тоа кога телото на Младиќ ќе биде пренесено во Србија и наведе дека сè зависи од бирократските процедури на Механизмот во Хаг. „Добивме одговор дека се на пат, па денеска ќе се вратат. Денеска ќе знаеме повеќе, бидејќи сега сè зависи од нивните процедури, што значи отворањето на истрагата, дали тоа ќе го забави преземањето на телото. Ние сме подготвени да тргнеме за Хаг веднаш штом дознаеме кои се следните чекори, со строго почитување на сите желби на семејството на генералот Младиќ, со кое ние од Владата сме во редовен контакт“, рече Вујиќ за телевизијата К1.
Тој додаде дека семејството ќе одлучува за сè што се однесува на погребот на Младиќ.
„Сè е на нив да го кажат. Сигурно е дека генералот Младиќ ќе ги има сите воени и државни почести што му припаѓаат кога станува збор за државата. За местото ќе одлучи семејството“, рече Вујиќ.
Преиспитување на начинот на кој било постапувано кон Младиќ
На прашањето дали Белград сега има простор да бара преиспитување на начинот на кој било постапувано кон Младиќ во последните денови од неговиот живот, Вујиќ одговори дека Србија ќе ја искористи таа можност и ќе му се обрати на Механизмот во Хаг.
Вујиќ рече дека синоќа пристигнало известување дека претседателката на Меѓународниот резидуален механизам за кривични трибунали, Грасиела Гати Сантана, наредила спроведување истрага за околностите на смртта на Младиќ, на кого не му било овозможено последните денови да ги помине во Србија.
„Таа го видела проблемот, не мислам дека ја увидела грешката. Јас денеска ќе испратам допис во кој ќе кажам дека очекувам таа истрага да не биде само за утврдување на причината за смртта, дали станува збор за откажување на срцето, белите дробови и така натаму, туку да оди и во насока на тоа дали бил соодветно лекуван во последните денови од животот, бидејќи тоа се наведува како спорно прашање“, истакна Вујиќ.
„Сите гаранции дадени со поддршка на претседателот“
Тој наведе дека сите гаранции во случајот со Младиќ биле дадени со поддршка и инсистирање на претседателот Александар Вучиќ.
„Неговото обраќање до Трибуналот и нашето обраќање, сè беше заеднички напор и со негова согласност ги нудевме сите потребни гаранции. Времето, за жал, нè претекна, од една страна, а од друга страна, бирократскиот однос кон толку значајно прашање како што беше прашањето за болен човек кој влегол во последните денови од животот“, рече Вујиќ.
Говорејќи за барањата на Србија Младиќ последните денови од животот да ги помине во Србија, Вујиќ рече дека од 20 август биле упатени четири дописи и дека цело време било предупредувано дека станува збор за денови кога е во прашање здравствената состојба на Младиќ.
„За жал, вчера, токму во моментот кога го завршувавме писмото до генералниот секретар на Обединетите нации, во кое зборуваме за потребата од негова интервенција, пристигна тажната вест дека генералот починал“, рече Вујиќ.
„Легитимно е да се отвори прашањето за хуманоста“
Министерот рече дека, по медицинските проценки за сериозноста на состојбата на Младиќ, било легитимно да се отвори прашањето за хуманитарниот однос кон некого кој се наоѓа во завршна фаза од животот.
„Легитимно е да се отвори прашањето за хуманоста. Ние и по првиот медицински извештај, кој не го дадоа независни експерти ниту лекари од Србија, туку лекари од затворската болница, добивме информација дека е неопходно палијативно лекување. Дури нагласиле дека семејството треба да дојде што е можно побрзо. Сите сигнали укажуваа дека крајот е близу“, рече министерот.
Тој додаде дека Србија веднаш побарала Младиќ да биде пуштен од хуманитарни причини, укажувајќи дека кога едно лице се наоѓа во таква фаза од животот, целта на казнувањето ја губи смислата.
„Тоа се и меѓународни стандарди, тоа е општо познато. Тогаш примарен е хуманитарниот аспект, особено кога животот се мери во денови. Тогаш се дава палијативна терапија, која не подразбира само медицинска терапија, туку и семејно опкружување, за тешко болното лице последните денови да ги помине со семејството. Тоа се медицински и хуманитарни правила“, истакна Вујиќ.
Тој наведе дека претседателката на Механизмот на 20 мај го одбила барањето на Србија за итно пуштање на Младиќ од хуманитарни причини и дека по влошувањето на здравствената состојба на Младиќ, тоа барање било повторено.
„Затоа што лекарите повторно рекоа дека состојбата на Младиќ нагло се влошува, дека веќе почнале да ја исклучуваат и медицинската терапија за придружните заболувања што ги има генералот. Ние напоменавме дека дури не биле исполнети ниту протоколите за лекување, бидејќи во такви ситуации кај нас, без оглед на палијативната нега, нашите протоколи вклучуваат продолжување на лекувањето и на придружните заболувања, колку што е тоа можно. Но тоа не е само наш протокол, туку протокол и на Светската здравствена организација“, наведе Вујиќ.
Осуден за геноцид и злосторства против човештвото
Младиќ, кој во последните месеци претрпел неколку мозочни удари, издржуваше доживотна казна затвор за геноцид, воени злосторства и злосторства против човештвото извршени за време на војната во Босна и Херцеговина.
Меѓу злосторствата за кои беше осуден е и неговата улога во масакарот во Сребреница кој се смета за најтешкото крвопролевање во Европа по Втората светска војна.
Поради злосторствата извршени во периодот на распадот на поранешна Југославија, меѓународните медиуми го нарекоа „касапот од Босна“.
Војната во Босна и Херцеговина, која траеше од 1992 до 1995 година, однесе околу 100.000 животи и остави 2,2 милиони луѓе раселени.
Младиќ беше воениот дел од тројката која доминираше во босанскиот конфликт, додека политичкото водство го претставуваа поранешниот претседател на Србија и Сојузна Република Југославија, Слободан Милошевиќ, и поранешниот лидер на босанските Срби, Радован Караџиќ.
