Одбојкарите на ОК Борец ветерани се победници на државната лига во одбојка, откако попладнево во Тетово, во финалето, го совладаа домаќинот ОК Шкендија со 2:1 (25:15, 12:25, 15:11).
Велешките ветерани до титулата стигнаа по возбудлив и неизвесен натпревар, во кој победникот беше решен во тај-брејк. Двете екипи водеа изедначена борба, но во решавачкиот сет Борец покажа поголема сигурност и заслужено се радуваше на нов трофеј.
Ова е трета титула за ОК Борец ветерани во трите години откако се одржува ова натпреварување, кое е дел од натпреварувачкиот систем на Одбојкарската федерација на Македонија. Велешани беа најдобри и на претходните две изданија, со што го продолжија својот победнички континуитет.
До финалето Борец стигна со убедлива победа во полуфиналето, каде што без поголеми проблеми го совлада ОК Скопје со 2:0, по сетови 25:15 и 25:15.
За ОК Борец ветерани сезоната сè уште не е завршена. Велешани добиле покана за учество на ветерански турнир во Суботица, Војводина, кој ќе се одржи на 12 декември.
