Шестгодишниот Бади Брејли од Англија успеа да собере повеќе од 15.800 долари за помош на напуштени кучиња, претворајќи ја тагата по загубата на своето домашно милениче во хуманитарна иницијатива.
Момчето од околината на Глостер дошло до едноставна, но несекојдневна идеја – на минувачите им понудило да ги хранат неговите две кози, Бела и Берти, во замена за доброволни донации. Собраните средства биле наменети за купување креветчиња и играчки за кучињата сместени во локалните прифатилишта.
Идејата се родила по смртта на неговиот десетгодишен далматинец Броди, кој починал од рак на коските, само неколку дена по поставувањето на дијагнозата. Броди бил особено близок со момчето и секоја вечер спиел покрај него.
За да ја реализира својата замисла, Бади со помош на татко му направил посебна дрвена конструкција низ која козите ги подаваат главите за да ги хранат посетителите. Подготовките траеле неколку недели, а момчето ги обучувало животните за да можат да учествуваат во иницијативата.
На почетокот немало голем интерес, но откако неговата баба ја споделила приказната на Фејсбук, почнале да пристигнуваат посетители. Подоцна, мајката на Бади отворила и онлајн кампања за донации, на која за само неколку дена се собрале повеќе од 15.800 долари од стотици луѓе.
Она што започнало како обид да се купат десет креветчиња за кучињата, прераснало во многу поголема хуманитарна акција. Семејството најавило дека средствата ќе бидат распределени меѓу повеќе организации за спасување животни, во зависност од нивните потреби.
„Навистина ми недостига Броди и мислам дека би сакал да им помагам на други кучиња кои немаат семејство што ќе ги сака“, изјавил малиот Бади за „The Washington Post“.
Неговата приказна е пример како една детска идеја, поттикната од љубовта кон домашното милениче, може да прерасне во голема акција на солидарност и помош за животните.




















