Ангел Самараков од Велес, полициски службеник и член на обезбедувањето на премиерот Христијан Мицкоски, е уапсен под сомнение за оддавање службена тајна. Акцијата е спроведена од Обвинителството за гонење на организиран криминал и корупција, во координација со МВР.
Според информациите од Министерството, Самараков незаконски поседувал службени материјали од МВР кои, како што се сомнева, требало да ги пренесе на трети лица. Тој бил фатен на паркинг пред хотел во Велес, во возило марка БМВ, заедно со уште едно лице – Б.К. При претресот бил пронајден ранец со службени документи, а од двајцата биле одземени мобилни телефони.
Дополнително, биле извршени претреси на повеќе локации каде биле запленети електронски уреди и други докази. Од МВР велат дека полицискиот службеник постапувал спротивно на законите и правилниците на Министерството, со што го сторил кривичното дело од член 360 од Кривичниот законик – „оддавање службена тајна“.
„При спроведувањето на полициската акција и преземените мерки и активности, на паркинг просторот пред хотел во Велес, во возило “бмв” затекнати се А.С., полициски службеник во Одделот за заштита на определени личности и објекти и Б.К., а при извршен претрес во возилото пронајден е ранец со службени материјали од МВР и од лицата се одземени мобилни телефони, по што се лишени од слобода. Исто така, од преземените мерки и активности во процесот на проверка, ОВККИПС констатира дека полицискиот службеник постапувал спротивно на законските и подзаконските акти на Министерството за внатрешни работи, со што истиот неовластено поседувал службени материјали, нивно откривање на трети лица надвор од министерството, а со кои дејствија го извршил кривичното дело по член 360 од КЗ“, соопшти МВР.
Портпаролката на Владата, Марија Митева, изјави дека безбедноста на премиерот Мицкоски не е загрозена. „Истрагата е во тек. За првпат во историјата на државата, уапсен е човек од обезбедувањето на премиерот поради сомневање за сторено кривично дело“, рече Митева за „Скопје1“.
Од опозицискиот СДСМ остро реагираа по апсењето, прашувајќи дали премиерот Мицкоски е лично инволвиран или ги диригира криминалните процеси во државата. Според СДСМ, обезбедувањето на Мицкоски е составено од „најголемите криминалци“, кои тој самиот ги одбирал.
„Самараков е втор случај поврзан со неговото обезбедување. Пред неколку месеци, шефот на неговото обезбедување претепа полициски службеници и спречи полициска акција за сузбивање на дрога – настан кој МВР се обидуваше да го прикрие“, потсетуваат од СДСМ. Според нив, јавноста има право да знае дали Самараков делувал самостојно или по налог од повисоки инстанци.
Додека истрагата продолжува, јавноста бара одговори – и за содржината на доверливите материјали, и за тоа какви безбедносни стандарди се применуваат при изборот на лица кои го обезбедуваат првиот човек на Владата.
Во меѓувреме, Сарамаков доби 30-дневен притвор под сомнение дека сторил кривично део „оддавање службена тајна“. Тој е спроведен во затворот во Шутка, каде ќе ја издржува мерката.
