На 28. издание на Меѓународниот театарски фестивал „Денови на комедија“ во Куманово, жирито составено од Александар Ивановски (претседател), Дубравка Киселички, Петар Андоновски, Гергана Трајкова и Стефан Јакимовски ги соопшти добитниците на фестивалските награди. Меѓу нив, особено внимание привлече успехот на Театарот „Јордан Хаџи Константинов – Џинот“ од Велес.
Актерот Благојчо Стојанов од велешкиот театар ја понесе наградата за најдобра споредна машка улога за неговиот настап во претставата „Госпоѓа Министерка“. Со ова признание, Театар Велес уште еднаш потврдува дека останува важен културен столб во македонската театарска сцена, особено кога станува збор за комедијата.
Стојанов со својот маестрален настап донесе свежина и длабочина во класичната улога, која жирито ја препозна како исклучително актерско остварување во конкуренција на бројни претстави од земјата и регионот.
Во останатите категории, доминираше бугарската претстава „Постојаната сопруга“ од Сатиричниот театар „Алеко Константинов“ од Софија, која освои неколку клучни награди — за најдобра актерка (Рада Каирјакова), најдобра сценографија (Нина Пашова) и најдобра режија (Бојка Велкова).
Наградата за најдобар актер ја доби Горѓи Јолески за улогата во „Бог на колежот“ (МНТ – Скопје), која беше прогласена и за најдобра претстава на фестивалот.
