Во Ликовниот салон во Велес вчера беше отворена археолошката изложба на камени споменици „Memento vivere“, која пред публиката ја отвора богатата и слоевита приказна за минатото врежано во камен.
Преку внимателно одбрани археолошки предмети и фотографии, изложбата ги претставува најзначајните примероци од збирката камени споменици – архитектонски елементи, релјефи и камена пластика, кои сведочат за уметничката умешност и духовниот контекст на времето во кое настанале. Посебен акцент е ставен на периодот на римското владеење на овие простори, кој оставил длабоки и трајни траги во културното наследство на регионот.
Изложбата е дел од поширок процес на санација, конзервација и ревитализација на збирката камени споменици, со јасна визија – таа во иднина да прерасне во постојана музејска поставка. Со тоа, камените сведоштва од минатото ќе добијат нов живот и трајно место во културната мапа на Велес.
Автор на изложбата е д-р Анита Василкова Мидоска, кустос советник археолог, а проектот се реализира под покровителство на Министерството за култура и туризам, во рамките на Годишната програма за поддршка на проекти од национален интерес за 2025 година.
„Memento vivere“ ќе биде отворена за посетителите во текот на јануари и февруари 2026 година, а воедно ќе биде и увертира во големиот јубилеј – 80 години музејска дејност во Велес, со што изложбата добива дополнителна симболична тежина и значење.
