Владата донесе нов пакет мерки со кои директно интервенира во цените на горивата, во обид да го ублажи притисокот врз граѓаните и домашната економија. На вонредна седница е одлучено да се намалат акцизите, со што дизелот ќе поевтини за 4 денари по литар, додека безоловните бензини од 95 и 98 октани ќе се намалат за 2 денари.
Паралелно со оваа мерка, останува во сила и намалениот данок на додадена вредност за горивата – од 18 на 10 проценти, кој ќе важи до крајот на кризната состојба, односно до 20 април. Премиерот Христијан Мицкоски истакна дека без овие интервенции, цените на горивата би достигнале значително повисоко ниво. Според неговите проценки, дизелот би се продавал за околу 102 денари по литар, а и бензините би забележале нов раст.
Со вкрстување на владините мерки и договорот со ОКТА, како што посочи премиерот, се постигнува стабилизација на пазарот. Практично, цената на дизелот останува непроменета, со што се амортизира потенцијално поскапување од околу 7 денари, додека бензините од 95 и 98 октани реално ќе бидат поевтини за 2 денари во споредба со изминатата недела.
Со овие чекори, Владата се обидува да го задржи ценовниот баланс во услови на нестабилни глобални енергетски текови, оставајќи простор за понатамошни интервенции доколку притисокот на пазарот продолжи.
