Одбојкарите на Штип УГД испишаа историја во македонската одбојка, освојувајќи ја шампионската титула по убедливиот триумф над Борец Велес со 3:0 (25:18, 25:18, 25:16) во третиот натпревар од финалната серија во Првата лига – мажи.
Иако велешани влегоа со желба да го продолжат финалето, Борец повторно не најде решение за разиграниот противник од Штип. Гостите имаа целосна контрола врз играта, доминираа во сите сегменти и со минимален број грешки рутински го приведоа мечот во своја корист.
Со оваа победа, штипјани ја затворија финалната серија со максимални 3-0, оставајќи го Борец без ниту еден триумф во битката за титулата. Уште поимпресивно за новиот шампион е што ова беше нивна седма победа во исто толку меѓусебни дуели сезонава против велешкиот состав.
За Борец, и покрај поразот, останува утехата што беше дел од големото финале и што во текот на сезоната прикажа борбеност и квалитет, но во клучните моменти едноставно налета на расположен и подобар противник.
