Денеска се слави успението, воскресението и прославувањето на Пресвета Богородица, и нејзиното преселување во Царството Божјо во полнотата на нејзиното духовно и телесно постоење. Овој ден се доживува како миг на посебна духовна радост, бидејќи Богородица, иако се упокоила. останува жива и присутна како заштитничка на верниците. Самиот лик на Богомајката објавува бескрајно спасение, сострадалност, грижа и доверба, сила и смирение, чистота и убавина, љубов.
Според црковното предание, откако го поминала својот земен живот во молитва и служење на Христос и Неговите ученици, Богородица чудесно преминала од овој свет во вечниот живот. Се верува дека апостолите, кои тогаш проповедале во разни делови на светот, биле чудесно пренесени во Ерусалим за да бидат сведоци на нејзиното Успение и дека, по нејзиното упокојување, тие го положиле нејзиното тело во Гетсиманија. На третиот ден по нејзиното Успение, бидејќи еден од апостолите не присуствувал на погребот и сакал да го види нејзиното тело, нејзиниот гроб бил отворен, но телото не било пронајдено внатре, зашто таа била вознесена на небото.
На овој празник, во сите православни цркви се служи света Литургија, а верниците се собираат за да се молат и да ѝ оддадат благодарност на Пресвета Богородица.
