Околу 200 полициски службеници од Секторот за внатрешни работи Велес денеска (25 април) учествуваа на марш во должина од 11 километри, организиран во рамки на активностите што Бирото за јавна безбедност на Министерството за внатрешни работи ги спроведува за унапредување на тимскиот дух, физичкото и менталното здравје на полициските службеници.
Маршот се одвиваше по однапред определена рута од селото Еловец до манастирот „Свети Илија“ во близина на селото Лисиче. Преку заедничкото пешачење, учесниците ја симболизираа и врската меѓу полицијата и заедницата на која секојдневно ѝ служат.
На настанот присуствуваа и директорот на Бирото за јавна безбедност Александар Јанев, како и раководството на СВР Велес.
Целта на ваквите активности е поттикнување на социјалната кохезија меѓу полициските службеници, зајакнување на тимската доверба и поддршка, како и нагласување на важноста од здрав животен стил и редовна физичка активност, што се сметаат за клучни фактори за успешно и квалитетно извршување на полициската служба.
Министерството за внатрешни работи, преку Бирото за јавна безбедност, најавува дека вакви маршеви и слични активности ќе продолжат да се организираат на територијата на сите сектори за внатрешни работи низ државата, со цел инвестирање во здравјето, добросостојбата и тимскиот дух на полициските службеници, што претставува директна инвестиција во безбедноста на сите граѓани.
