СДСМ преку партиско соопштение реагираше на изјавата на премиерот Христијан Мицкоски дека локалната власт во Гостивар треба да понесе морална одговорност за случајот со труењето.
Од партијата оценуваат дека ваквата изјава претставува, како што велат, „уште еден обид за бегство од одговорност“, додавајќи дека наместо да се зборува само за морална, треба да се утврди и кривична одговорност.
Во соопштението се наведува дека министерот за здравство и Министерството за здравство имаат директна одговорност за случајот, а според СДСМ, информацијата за труењето и загаденоста на водата била криена пет дена, додека надлежните институции не реагирале навреме.
Според партијата, случајот не е само пример за лошо управување, туку и показател за, како што наведуваат, отсуството на реформи, особено во правосудството, како и за целосната контрола врз институциите.
„Затоа и нема реформи. Затоа што Мицкоски не сака независно судство и обвинителство. Затоа што сака да може преку собраниска говорница, медиуми и телефон да нарача политички пресметки. Затоа Европската унија враќа закони, а Европската комисија во извештаите ја опишува катастрофалната состојба во судството и обвинителството. Затоа Мицкоски зборува само за морална, а не за кривична одговорност. Затоа што добро знае дека ако се отвори прашањето за кривична одговорност, прв на ред ќе биде тој, а потоа и целата негова Влада заедно со партнерите од тендер-коалицијата. Сите тие знаат каде завршуваат – во Шутка и Идризово“, се вели во партиското соопштение на СДСМ.
