Денеска, 23 мај, во земјава се одбележува Националниот ден на Власите, празник посветен на културата, традицијата и идентитетот на влашката заедница.
По тој повод, во повеќе градови низ државата се организираат културни манифестации, концерти, изложби и средби со кои се оддава почит на богатото културно наследство на Власите. Традиционално, најголем дел од активностите се одржуваат во Крушево, град кој важи за еден од симболите на влашката култура и традиција.
Националниот ден на Власите се одбележува во чест на историското признавање на Власите како посебен народ, а празникот претставува можност за зачувување и промоција на влашкиот јазик, обичаите и културните вредности.
Претседателката Гордана Сиљановска Давкова во честитката по повод 23 Мај – Националниот ден на Власите истакна дека треба да сме горди како единствената држава во којашто Власите се уставен етнички ентитет, рамноправен со другите и еднаков во уживањето на индивидуалните и колективни права.
„Почитувани сограѓани Власи, Вие припаѓате на древната духовна лоза на балкански народи, чие историско опстојување не е врзано за моќ и граници, туку за јазикот, меморијата и свеста за посебниот влашки идентитет“, нагласи Давкова.
„Треба да сме горди како единствената држава во којашто Власите се уставен етнички ентитет, рамноправен со другите и еднаков во уживањето на индивидуалните и колективни права. Има ли поголема потврда за демократската зрелост на македонскиот политички систем, како и за инклузивноста на македонското општество кон сите заедници? Со својот сестран општествен придонес, Власите оставија и продолжуваат да оставаат небришливи траги на секое поле! Нека е честит 23 Мај, Националниот ден на Власите! Вечен да е! – се наведува во четитката на претседателката Сиљановска Давкова.
