Министерството за внатрешни работи ги повика учениците кои планираат да конкурираат на јавниот повик за прием во Средното полициско училиште да не се отпишуваат од средните училишта во кои моментално посетуваат настава.
Од МВР појаснуваат дека кандидатите кои ја завршиле првата и втората година во некое средно училиште не треба да преземаат никакви чекори за отпишување во текот на процесот на пријавување и селекција.
Воедно, Министерството информира дека потребната документација за аплицирање треба да се достави во оригинал или како копија заверена кај нотар.
По изборот на кандидатите, Министерството за внатрешни работи ќе склучи договор за школување со примените ученици и нивните родители, старатели или законски застапници. Со тој договор ќе бидат регулирани и сите понатамошни постапки и обврски поврзани со училиштата во кои учениците досега се школувале.
